الاثنين، 30 أبريل، 2012

عن خزعبلية الذات اتحدث مع تكملة واجبة :)


سلام عليكم

ازيكم :)

يمكن من اول ما دخلت الي عالم العم بلوجر وكنت حيادى فيما اكتب علي اد ما اقدر في ناس فعلا انتقدتني علي الحياد ، وناس تانية اعجبت بالحياد ، وناس تالتة كانت بتشكر علي اي حاجة وخلاص ..وبحترم الجميع ..والجميع علي قلبي زي العسل ...بس بصراحة شايف ان الحياد في بعض الحاجات مش حلو خاصة واحنا داخلين علي انتخابات رئاسية تعتبر من اهم الانتخابات في تاريخ مصر ..


اتفقت او اختلفت مع الانتخابات بس لازم نتفق علي شىء في النهاية ان مصر فعلا بتمر بمنعطف تاريخي ولازم تخرج منه بأقل الخسائر ..

طيب قبل ما ابدأ اتكلم هتكلم في نقطة معينة ومعلش استحملوني فيها ..هتكلم عن نفسي شوية ..فضفضة يعني ..



العبد لله جاء من خلفية زى ما تقول كدة شبه اسلامية ...طبعا ياللي هتقرأ هتقول يعني ايه شبه اسلامية دى يعني مثلا شبه جزيرة ولا ايه ؟

هجاوب عليك هقولك اه ..انا ايام الكلية انضميت لجماعة الاخوان المسلمين واعجبت بيهم في فترة كانوا هما القطب الوحيد للمعارضة السياسية للنظام ..في البيت عارضوني بشدة بس في الاخر كالعادة قالولي جرب وانت اللي اخترت ..حطيت في نفسي ان الاخوان مش هما اللي في دماغي بس ادخل ياواد واتعرف ..اتصاحبت علي ناس كتير منهم ولغاية دلوقت اصدقائي المقربين منهم ..اعجبت ببعضهم ..وكرهت البعض الاخر ..لقيتهم جماعة بشرية زى اي حد فيها الكويس وفيها الوحش ..فيها المتشدد وفيها الوسطي ..اعجبت بقيادات كتير كان اهمهم عبد المنعم ابو الفتوح واللي هتكلم عنه في السطور الجاية شوية ..


المهم خرجت من الجماعة لاسباب كتير جدا ..والكلام من قبل الثورة قولي كدة في 2009 بس بعد ماخدت اللي انا عاوزه فعلا من الناحية الفكرية ..علي فكرة ممكن كدة تقول عليا شخص انتهازى وصولي بحب المنفعة ..الحقيقة ممكن تحسبها كدة ..لكن عن نفسي عمرى ما حسبتها بالمنطق دة خالص ..لسبب بسيط اني بعتبر نفسي من اولئك اللي ملهمش توجه غير التوجه المستقل اخد الفكرة واحطها في دماغي وابلورها حسب معتقداتي ..بس في نفس الوقت ممكن تعتبرني شبه اسلامي لاني اتأثر بالفكرة الاسلامية عموما في السياسة لكن بطريقة الاخوان ..لأ بل وبعارضها شكلا وموضوعا ودة له كلام تاني ..

ليه بتكلم عن نفسي ..

مش منظرة وان كان ليا الحق فدي مدونتي واكتب اللي انا عاوزه بس انا بتكلم في فكرة الحياد نفسه ..اعتبرني من هنا لغاية الانتخابات ومابعدها مش حيادى علي الاطلاق ..هبقي متحيز لفريق معين ولاسباب معينة جدا ومتسقة مع نفسها وبعد تفكير عميق ..

هتلاقيني منحاز بشكل واو بأخر لشخصين

عبد المنعم ابو الفتوح في انتخابات الرئاسة وحزب الدستور بتاع دكتور البرادعي ...يعني تعتبرني دستورى اسلامي فتوحي في نفس الوقت ..ودة زى ما قلت لتفكير عميق جدا وبعد شهور من بعد الثورة ..



هتلاقيني معارض للحرية والعدالة وحزب النور ..اقرب لتفكير حزب الوسط والتيار المصرى ..متبني لافكار ليبرالية شوية لا تتعارض مع المنهج الاسلامي عموما ...فهمت حاجة ؟

الحقيقة ملقتش مبرر لاني اتكلم عن كدة غير للفضفضة في مدونتي العزيزة ..ولايضاح ما يمكن جهله عني ؟؟ مش فشخرة ومنظرة فارغة ولو عاوز تعتبرها كدة اهلا وسهلا انا بتفشخر وبتمنظر عليكم D:

ندخل في الجد

ليه المقدمة الفظيعة دى ..ببساطة عشان البوستات الجاية اللي هتبقي متحيزة لأطراف معينة منها طبعا ابو الفتوح والبرادعي اكتر اتنين دخلوا دماغي من قبل الثورة وبعديها وغاليا كدة بسعي للاتنين دول عشان اتعلم من دماغهم بشكل او بأخر لهدف اسعي اليه .. ..اعتبرني كدة ..ولله النية والقصد ..

نكمل بعد فاصل قصير

هقفل التعليقات والتعليق اللي مش عاجبني هعرضه متقلقش انا ديموقراطي

يالا علق بقي

انتهي