الاثنين، 9 أبريل 2012

عودة بجد

ازيكم
مش عارف في حد هنا ممكن يدخل او لا
انا لما دخلت مدونتي كنت عاوز ابكي
حاسس انها زعلانة مني اوى بسبب اني هجرتها تماما ومش بزورها ابدا الا بعض الساعات
لما بقرأ اللي كتبته من سنة او اكتر ببقي عاوز اعاقب نفسي اني مش بكتب فيها
مش عارف دي المرة الكام اللي بقول فيها هرجع وميحصلش
الموضوع كله كسل مش تعمد ..ومش عارف بكسل ليه
مدونتي ليها الفضل بعد ربنا اللي خلتني بعرف اكتب خلتني هيثم مش حد تاني
بجد زعلان جدا وبجد عاوز ارجع تاني
خايف اقول انا راجع وميحصلش بس فعلا المرة دي زعلان لدرجة اني عاوز اجبر نفسي علي الرجوع
لازم ارجع الحقيقة
وخلاص اهي الثورة راحت لحالها وكل حي خد الحتة بتاعته وخلاص
ارجع انا كمان لمدونتي اللي غالبا هي اغلي ماعندى في الحياة الان بعد ما كل حاجة بتروح ومش بترجع
مدونتي العزيزة ..انا راجع سواء برضايا او غصب عني

اخيرا رجعت بيتي الاصلي :)

وحشتوني يامدونين جدا ويارب تشوفوا البوست دة وكل واحد يعلق ويقول ماعنده
ملحوظة وبجد مش هزار
انا هكتب تاني بس مش عاوز مناقشات بيزنطية ولافارسية انت تقرأ وتقول رأيك وانا هتقبله
وعليك ان تتقبلني وتعصر علي نفسك لمونة كفاية كل حتة مناقشات وتخوين وانت تبع مين وانا تبع ايه
مش عاوز دة
اكتب وخلاص عشان ورمت والله
ملحوظة تانية
ان انتمائى اني مسلم عربي مصرى
غالبا هبهدل كل التيارات السياسية اللي مش عجباني
يعني هكتب تاريخ وسياسة كمان يالا بقي خليها تخرب
:)
اراكم قريبا جدا باذن الله