الجمعة، 4 فبراير، 2011

افهم ارجوك

الي كل من تأثر بالاعلام الحكومي عاوز اسأل سؤال وحد يجاوبني وبعد كدة نصيحة

السؤال :

هو انت من امتي بتتفرج علي القناة الاولي والتانية والفضائية عشان تتفرج عليهم دلوقت ؟

جاوب انت بقي

وحاجة تانية

انت قريت قصة فرعون وموسي قبل كدة ؟

اقرأها الله يهديك

طيب سؤال غلس برضه

هو القرضاوى عميل للموساد ؟

طيب بلاش

واحد حرامي وسرقك

ويقولك والنبي سيبني عشان اشتغل عندك شوية ؟

بلاش كدة

طيب ايه نغمة بابا حسني دي ؟

اللي اعرفه ان الراجل موظف وغالبا المفروض بياخد مرتب عشان بيشتغل عندك وبيخدم عليك طيب هو ابوك بيشتغل عندك وبيخدم عليك ولا الموظف ؟

ارجوك جاوب وبلاش تقول علي اهل بلدك عملا والنبي ياشيخ بلاش

ولو لقيت بيقولك مسكوا اسرائليين ومسكوا حزب الله وحماس مش هقولك لا مسكوا

هو الشعب المصري اهبل عشان يهيجوا اسرائليين وحزب الله وحماس

وعلي فكرة الاجانب اللي ميدان التحرير دول صحفيين اجانب مش عملا

صحصح يامواطن واعرف انهم بيشوهوا اجمل حاجة عملتها في حياتك


هناك 14 تعليقًا:

mrmr يقول...

انا لا أثق ابدا فى التليفزيون المصرى
كل ولائه للرئيس مبارك فقط
علشان كده مش بيقول حقائق كل ده لتهدئه الشعب ورجوعه لبيته ويفسد عليهم ما حققوه من نصر
ربنا يكمل ويعديها على خير

Tears يقول...

لو لم يرحل مبارك امس قبل غد فسيستعيد نفسه و ينتقم من الجميع و لن يرحل ابدا و لنا تجربة مع وعود مبارك خاصة و قد نقض كل كلامه بعد خطابة الاخير بيوم واحد و اعتقل شباب و ارسل بلطجية قتلوا منهم 11 فى ميدان التحرير عشية خطابة

و مش بعيد يعمل عملية ارهابية و تتخذ ذريعه للاستمرار و الاستقرار و الاعتقال

حرام دم 311 شهيد مصرى نفرط فيهم عشان شوية حرامية و منتفعين غسلوا دماغ الناس فى الاعلام

Noha Saleh يقول...

الفكرة مش فى التلفزيون المصرى او غيره
يعنى هو ينفع القناة اللى بتفرج عليها توجهنى
يعنى لو اتفرجت على الجزيرة ابقى ضد الرئيس ولو اتفرجت على القناة الاولى ابقى ضد المتظاهرين
الفكرة ان كل واحد لازم يكون له رايه ولازم الاخرين يحترموا الراى ده حتى لو مختلفين مع بعض
الناس اللى نزلت الميدان عملت حاجت كتير حلوة ماقدرتش تعملها المعارضة الخيبانة اللى عاوزة تركب الموج دلوقتى
بس متهيالى ممكن الناس تهدى شوية وتشوف المطالب هتحقق ولا لا
ولو ماحصلش الميدان موجود يرجعوا تانى
مش عارفة ده رايى ممكن يبقى صح او غلط بس فى النهاية مجرد راى مش هيعمل حاجة

Tarkieb يقول...

تليفزيون حقير+عصابة+جهل+أمريكا+أسرائيل كل دول واقفين في طريق ثورتنا

Ms Venus يقول...

نفس كلام نهى




اولا الدوا لما بيزيد عن حده بيقلب ضده


والى حصل ده عامل بالظبط زى ناس محبوسة فى سجن قاموا وساعدوا بعض يهدوا جزء من الحيطة علشان يدخلوا الشمس والهوا


فضلوا يهدوا يهدوا زيادة لحد ما الحيطة نفسها هتضعف

وتقع عليهم


وزى ما انتوا ليكم رأيكم


وعملتوا شىء فخر لينا كلنا ولكل مصرى


لكن رأئينا بيقولكم كفاية لو سمحتوا لحد كده


من حقنا يا هيثم نحب بلدنا ونخاف عليها

Ms Venus يقول...

معلش هرد على تيرز


هو قال مش هترشح


واعلنها والعالم كله سمعها


ومش بس العالم سمعها لا ده فى ضغوط عليه من برة انه يمشى

يعنى هيمشى هيمشى


هيستفيد ايه من انه يعمل اللى بتقوليه ده ؟؟


وهيستفيد ايه من حكاية البلطجية ؟

ما هو ماشى ؟


ولو مش مشى ما احنا موجودين يا ناس

ليه متصورين انه مستحيل نطلع تانى وتالت والف ؟

Haytham Alsayes يقول...

طيب انا هارد علي فينوس ونهي
كلامكم بحترمه جدا اكيد
بس انا بس عاوز احكيلكم واقعة
الرئيس مبارك سنة 81 قال مش هترشح الا لفترتين وفي سنة 93 اترجاه مجلس الشعب والشورى وقدم مصطفي كمال حلمي رئيس مجلس الشعب وثيقة بالدم بيترجوه انو يبقي لفترات اخرى
عاوزكم تفكروا في الكلام دة وتردوا عليا ارجوكم

واحد من الناس يقول...

هيثم مش التلفزيون لوحده لما محامي مجترم ومبيحبشش مبارك يطلع قول
بكرة اول ربيع الاول من الاشهر الحرم ويحرم فيه القتال على المسليمين يبقى بيستعبط مش بيتناقش لان ربيع الاول مش من الاشهر الحرم اصلا فضلا على اننا مش بنحارب غير بصدورنا العرية , لما كتير من الناس تبص للضحية واللي يقوله ايه اللي جابك هنا واللي يقوله تستاهل واللي يقوله بلاش فتنة بالرغم انه شايفه المضروب مش الضارب يبقى بيستعبط مش بيتناقش , لما يكدب 30 سنة ويقول مش مترشح وبعدين يطلع مظاهرة مدفوعة الاجر تتحايل عليه يكمل علشان خاطر مصر بعد 6 شهور اللي مشفش المنظر ده قبل كده ولا متخيله ياريت يسيب اللي شافه ومتخيله وعلى يقين انه حيحصل تاني يجيب حق مصر من اللي نهبها ويرجعه للمصريين اللي اكلوا من الزبالة
اللي مشفش غزوة التحرير على ظهر الجمال والخول بعد وعده المباشر وبيقول مش هوه طيب مين ؟ المتظاهؤين بيقتلوا نفسهم ,ومشفش عربية مدرعة بتقتل في الناس بعد اعتذار شفيق مباشرة يعرف ان النظام هوه اللي فيه ناس مصممة على التصعيد خوفا على مكاسبها وعلى هبلها الاعلى اللي صورته اتهزت في قلوب مريديه واللي كانوا بيسبحبحوا بحمده , وبعد دعوة الحوار يعتقل 9 من رؤوس الشباب المنظم للمظاهرة لازم يعرف ان هيه دي النية المبيته للكل , مستحملش يستنى لغاية ما الامور تهدى علشان يثبت لنفسه انه لسه جبار متكسرش
اخواني واخواتي اذا كان الشباب اللي مصر كلها رفعت راسها بيه في العالم كله متامرين وخونه وبتوع اجندة خارجية وبيقبض من الموساد والامريكان وحسني مبارك هوه الوطني اللي بيحب مصر ومن كتر حبه ليها ولع فيها وقسم اهلها يبقى معدش فيه كلام نافع اذا كانت الشمس محتاجة دليل على وجودها يبقى الكلام خلص ,

sal يقول...

انا مع احترامى للجميع عايز اقول
اللى باين
ان هناك حالة لدى البعض تألفت مع القهر والاستبداد وسكنت لديها جزئية من المشاعر البشرية التى لا يعرفها او يحسها ويقدرها الا من عاشها شخصيا فى ميدان التحرير

....
هل تصدقوا انه حتى الان لا زال النظام يستخدم اخس الوسائل مع احرار التحرير
هناك من يحاصرونهم لمنع الطعام والشراب عنهم
ومنهم من ذهب لاحضار الطعام وتم اعتقالهم ولم يعودوا
هناك ادوية ومعدات طبية صودرت من طرف الامن ووووووو
هذا لو تناسينا ما حدث ليلة الاربعاء من رمى المولوتوف والرصاص والطوب
يعنى كل الناس اللى ماتوا وبعدين يقولك
سيتم التحقيق ههههه

فوقوا بقى

احييك يا هيثم
وربنا ع الظالم

Ms Venus يقول...

اللى اعرفه اننا بنضحى بدمنا علشان خاطر بلادنا فى الحرب

ليه دلوقتى عاوزين نضحى ببلدنا علشان دمنا ؟

Noha Saleh يقول...

ممكن يكون حصل زمان
بس دلوقتى خلاص الناس اتغيرت محدش بقى بيخاف
نهدى شوية مش علشان حد والله بس علشان مصر
هو كده كده مش هيقعد

Ms Venus يقول...

بردز متفقة تماما مع رأى نهى


اللى انت بتقوله صح يا هيثم

بس ده كان زمان

لما كان الشعب نايم ومالوش صوت

لكن الدنيا اتغيرت

وعرفنا نقول لا

ومحدش هيقدر يضحك علينا تانى


يبقى نخاف على بلدنا بقى ونحافظ عليها

ونتعلم ان الديمقراطية اللى احنا عاوزينها مش هى مرة وخلاص مش هتتكرر لا

المفروض الديمقراطية واحتياجنا ليها يكوون بقى طبع فينا


مش مرة و خلاص

Haytham Alsayes يقول...

يافينوس
يانهي

بغض النظر عن رأيكم
الناس عمرها ما هترجع زى زمان لو فشلت الحركة دى
لسبب بسيط
الاعلام اللي شغال دلوقت
اذا كان لسة معداش اسبوع وعملوا غسيل مخ للناس وخلاص بقي الريس اسمه بابا حسني

دة غير ان جهاز امن الدولة هيصفي المعارضين ومش بعيد يسحلهم في الشوارع بحجة انهم عملا للموساد

و6 اشهر وقت طويل في السياسة
ازاى تأمنوا لواحد كدب عليكم 30 سنة ياعالم

سمو الامير يقول...

لأنهم في الغالب مش بيقتنعوا أحب ابلغهم بالرسالة دي ( واللي لاقيتها بالصدفة على فيس بوك )

من حقك ان ترضى بعبوديتك و لكن دعنى أحلم بحريتى
من حقك أن تحيا من أجل لقمة عيشك و ...لكن دعنى أموت من أجل حلمى
من حقك أن تعيش فى ذل ارتضيته ولكن دعنى أدافع عن عز أنشده
من حقك أن ترضى بالمجارى شرابا لأبنائك و لكن دعنى أحلم بكوب ماء نظيف لابنائى
.......من حقك أن تتخذ من الرحيل و الهجرة خلاصا لكن دعنى أدافع من أجل وطن اتخذت