الثلاثاء، 26 أبريل 2011

بيان تدويني

عاوز ارجع تاني لمدونتي ..معنديش اي احساس اني افيد تاني او حتي موجود مواضيع في دماغي اقدر اكتبها زى زمان ..مش عارف ايه اللي حصل ..عاوز من الناس اللي بتدخل او اللي لسة فاكرني يقترح عليا اي حاجة اكتبها او حتي اغير نشاط المدونة حتي ..مش عارف بجد ..ارجو من اصدقائي الوقوف معي في هذه اللحظات الصعبة ..والله الموفق والمستعان

هناك 15 تعليقًا:

richardCatheart يقول...

ازيك انت يا بو الهيثم

شوف يا هيثم المدونه هى طرف خيط مجرد وسيله مياعده للعوده للنفس ماتتصورش ان الموضوع سهل وخصوصا بعد تجربه مره وغبيه هاتفضل فتره كدا مش عارف مش عايز بس افضل حاول

اقتراحى انك تفضى الشحنه اللى جواك
فردوسك الضائع مش مجرد تاريخ

فردوسك فى كل حاجه
اكتب احساسك حتى لو مش مرتب

اكتب افكار خاطره حتى لو مافهاش حبكه او مضمون كفايه انك تخرج اللى جواك

العود احمد واشرف وكريم يا سيدى
وهاترجع لنفسك بس لما تخلص عذاب استحمل يا واد انت راجل وسيد الرجاله كمان

ربنا يوفقك ويفتحها عليك خلى بالك من نفسك

شمس النهار يقول...

اهلا اهلا بالغايبين

اكتب مذكراتك ايام الثورة من يوم 24 يناير الي الان
انت بتعرف ترتب الافكار والوقائع بطريقة رائعة
نستغلك ونستغل موهبتك انك تأرخ لنا الفترة دي
ياله بلاش كسل سمي الله وابتدي

فاتيما يقول...

صباح الخير يا هيثم

بص انا روحت وجيت
وانا بحاول اكتب حاجة ممكن تنفعك
ملقتش غير اللى رجعت اقوله
وقلب القطة قطاطقيطوا خدته من على طرف قلبى ...

حاول تطلع اللى جواك وبس
مترتبهاش ولا تحسبها قوى
احنا عندنا استعداد نقرى اى حاجة وكل حاجة هتكتبها
مش لازم تكون ف التاريخ
او الثورة
او مواضيع رسمى فهمى نظمى
ولا حتى انتا مضطر تفكر بشكل جامد
هتكتب ايه وتعمل ايه

اكتب وخلاص
اكتب وبس
اكتب واحنا نقرى

مش لاقية حاجة تانى اقولها
غير انك وحشتنا
واكتب اللى تكتبه
مش هنقول على حاجة
لأ
ويع
وايه دا
و حرام كفاية
ومدونة اونطة هاتوا تعليقاتنا


هاه
نتحايل كمان
ولا كفاية كدا ؟!!

:)

سلام يا صاحب الفردوس

ستيتة يقول...

بحث عن 1954 يا برنز
وقت مطالبة انصار محمد نجيب بالديموقراطية
والملابسات بتاعة شعب مصر لما خرج بنفسه في الشارع وطلب يتعكش من قفاه

عيش بقى سلسلة متسلسلة وورينا الربط والروائع

تحياتي

ابراهيم رزق يقول...

حاسب من الاحزان و حاسب لها
حاسب من رقابيك من حبلها
راح تنتهى و لابد راح تنتهى
عجبى ؟؟؟

اخى العزيز
اكتب ما تريد اكتب ما يجول بخاطرك اخرج ما بداخلك من المستحيل الا يكون شىء بداخلك اكتب عن شىء بداخلك حلاوة او مرار

ثق انك ان اخرجت ما بداخلك حتما ستستريح لكن
تحياتى

ليلى الصباحى.. lolocat يقول...

السلام عليكم اخى العزيز

كلنا افتقدناك جدا جدا جدا

عن نفسى كنت اظن انك مشغول بالدراسة والدكتوراه

قبل اى شىء اسأل الله تعالى ان يزيل الهم والحزن من قلبك اخى العزيز
وتعود لنا بسرعة وتكتب فى اى شىء واكيد اى حاجة هتكتبها هتكون جميلة لانك انسان موهوب وفى عقلك الكثير والكثير ننتظره


لا تدع الهم يسيطر عليك
كلنا ياهيثم لدينا مانتحمله لكن لا تدع الهم يقتلك او يتحكم فيك

اما ما تكتبه طبعا اكتب عن حالتك النفسية ومشكلتك لو ممكن تقدر تكتب فيها يمكن تلاقى الحل هنا بين اصدقائك

اكتب خواطرك وابعد شوية عن التاريخ
عالج نفسيتك بالكتابة يا هيثم والله كل اصدقاءك مفتقدينك بس انا عن نفسى توقعت مثل ما قلت لك انها الدراسة

فى انتظارك اخى العزيز لا تتاخر على اصدقاءك واخوانك ربنا معاك ويزيل همك


لك ارق تحيو وتقدير

غير معرف يقول...

اول مره اجى هنا الاقيك كده ينفع يعنى
يا عم فكها
مش وقت اكتئاب خالص ده حتى الجو بديع و الدنيا ربيع
انا خالى شغل او مستغنيين عن خدماتىو و جيت هنا مش عارف ازاى علشان افرفش
فأرجو انك تساعدنا حنا الاتنين نخرج من الازمه دى دلنى نعمل اى حاجه
نعمل جمعيه مكافحه الاكتئاب
يلا مستنى ردك
اخوك
ميزو

Ms Venus يقول...

ايه لسه فاكرينك دى يا هيثم ؟


هو فى حد بينس اخواته بردو ؟


الحالة اللى انت فيها دى كلنا بنمر بيها

وانا ياما مريت بيها كتيررررررررر


انت بتكتب عن التاريخ واحنا نفسنا هنبقى بكرة تاريخ

واللى بيحصل فى مصر دلوقتى بكرة هيبقى تاريخ

ممكن تكتب فى اللى بيحصل

اكتب وجهة نظرك فيه

وكمان تابع اصحابك واخواتك

اكيد الحالة دى هتاخد وقتها وتروح

ما هى الدنيا كده

ربنا معاك ويريح بالك وعقلك وقلبك

Unknown يقول...

أنا من رأي شمس النهار و الدكتوره ستيته بس في الأول و الآخر محدش يقدر يفرض عليك حاجه لأن خيالك هو اللي بيحرك قلمك...تعرف أنا رجعت الشغل من حوالي شهر و تقريباً بالحسابات معنديش وقت حتى للقرايه و كنت فاكره اني مش هكتب تاني غير يمكن مره كل شهر بس اللي حصل اني مقدرتش أبعد عن التدوين و الكتابه رغم كل الظروف انت كمان لو اديت نفسك الاستعداد و فتحت ورقه بيضا هتلاقي الأفكار طلعت غصباً عنك و مش ضروري تكتب نمط واحد و لو انك موهوب في الكتابات التاريخيه...يعني هو ده وقتك عشان تأرخ الفتره المهمه دي و تربط ما بين أحداثها و اسبابها و نتائجها.
توكل على الله و إحنا في إنتظار جديدك و أكيد هيكون في روعة القديم.
تحياتي ليك

Unknown يقول...

السلام عليكم

أخي الحبيب.. لسه بغلس عليك في مدونتي علشان تظهر.. لاقيتك ظهرت (أكيد طبعا مالحقتش كلماتي توصلك! طبعا صدفة.. بس سعيدة إن شاء الله)...

بالنوسبة لسؤالك...

أعتقد يا هيثم إنك وضعلت حل كويس للإشكالية: وهي إنك توسع (وتنوع) مجال المدونة.. ده هيعطيلك مجال رحب من إخراج كل ما يعن لك (دون تأنيب ضمير تجاه مدونتك.. إن جاز التعبير!)..

وعامة أنا شايف إن فيه حاجة أنا شخصيا (كمغترب بعيدا عن مصر) أحتاج التعرف عليها: وهي أحوال الشباب واحاسيسهم بعد الثورة.. هل يشعرون أنهم همشوا بعد الثورة مرة أخرى.. ما تطلعاتهم وآمالهم التي كانوا يتوقعون تحقيقها بعد الثورة؟ وهل يتعجلون تحققها أم يدركون أن الأوان لم يحن بعد؟
ماذا عن أخلاق الشباب الذين شاركوا في الثورة بعد سلبية.. هل تغيرت فعلا؟

وهناك فكرة (وليست موضوع محدد) وهو استخدام أسلوب السلسلة، فهو يشجع على الاستمرار (خاصة مع تفاعل القراء.. الذين من الواضح أنهم ينتظرونك)..

وهناك الموضوع الذي لا فكاك منه وأعتبره أمكانة في عنقك (وهو الذي طرحته أختنا شمس النهار وأؤيدها فيه تماما).. يومياتك مع الثورة.. وخروجها منك له أهميتين في رأيي:
1- أن لك القدرة التي ربما ليست لغيرك على صياغة الأحداث بأسلوب واضح ومشوق لا يمل منه القارئ.
2- أنه يمثل أحداث الثورة في الأقاليم، وهو ما نحتاج إلى تدوينه وتسجيله جنبا إلى جنب مع أحداث التحرير.

منتظر التدوينة القادمة بإذن الله... وأيا كان محتاواها.. إحنا جنبك إن شاء الله... حتى لو كانت فضفضة..

تحياتي أخي الحبيب.

كلمات من نور يقول...

خد بريك يا هيثم

دقيقتين تلاته وخد نفس شهيق زفير

واعملنا بوست مقارن عن الثورات

Unknown يقول...

على كل انا سبتك تاخد راحتك حتى مكنتش برضى اكلمك على الفيس ,اقول سيبه لو محتاج يتكلم حيلاقيني


بص يا عم الحج , انت تقعد على الكي بورد ( مش عليها هيه ) لا تقعد قدامها يعني :)
وتكتب اول حاجة تيجي على بالك حتى لو ملهاش معنى او مش مترابطة او ملهاش لازمة , اكتبها وخلاص طالما جت على بالك تبقى مهمة ليك ومش مهم تبقى مهمه لاي حد , وبعد متخلص كتابة وتعرق وحد يمسحلك راسك من العرق بمنديل ابيض معقم :) زي التلفزيون كده يعني

شوف الكلتم ده ينفع يتنشر ولا لا يعني خدلك دقيقة او اتنين اقرا فيهم اللي انت كتبته , اذا كان صالح للنشر انشره وسيب الناس تتفاعل معاك وتشاركك همومك , اذا كان غير صالح للنشر كشىء شخصي او متحبش حد يقراه و لحظة ضعف تحب تكون ليك واحدك , متنشرهاش بس حتحس ان انت استريحت خلاص , وساعتها تقد تكتب ما يطلبه المستمعون ومتنساش تدعيلي
ربنا يكرمك بكرمه ويحفظك بحفظه ويجعلك من اتباع شفيعنا يوم الدينا
قول امين

mrmr يقول...

ازيك يا هيثم
كل ربيع وانت طيب
كل اللى عايزه اقوله اتقال خلاص
معنديش كلام يتقال
اوقات كتيره بتمر بينا صعبه المهم اننا نحاول نكون اقوى منها
ربى يسعدك

Haytham Alsayes يقول...

شكرا لكل الناس اللي دخلت وعلقت
ان شاء الله كل المواضيع اكتبها لاني قررت ان ارجع تاني اكتب لانه هيخرجني من اللي انا فيه
عموما تحياتي لكل فرد باسمه
اعذروني مش عارف ارد علي كل واحد بس بجد
ربنا يجازيكوا خير

تحياتي

Tears يقول...

اكتب عن رايك فى اللى بيحصل بشكل مبسط مش بالتاريخ عشان الوعى يزداد و يبقى اسهل فى الانتشار