الخميس، 29 ديسمبر، 2011

اي كلام فاضي

تقريبا دي اول مرة اكتب بالعامية 
واكيد اول مرة اكتب اي حاجة غير مرتبة مسبقا واكيد برضه مش تاريخ 


سنة 2011 والله العظيم تلاتة ياشيخة انا كرهتك من كتر ما شفت فيكي طبعا علي المستوى العام حدث ولا حرج 
ثورة قامت ولم تكتمل 
شوية جنرالات خايفيين علي مصالحهم وعشان كدة سرقوا الثورة 
مواطنين شرفاء عمالين ليل نهار يصوتوا ويولولوا زى النسوان (مع الاحترام للنساء الجدعة ) ويقولك العجلة نايمة والشغل والبلطجية بتوع التحرير 
كل حاجة بايظة 
الانتخابات مخنوق منها ومن اللي فيها ومن اللي فاز فيها ومن كل التيارات والكل كليله 


وطبعا بلاش اكتر الكل عارف وشايف وحاسس 


علي المستوى الشخصي :برضه الحالة مش علي ما يرام 
مش عاوز اقول كلمة موجزة بس نقول الحمد لله علي كل حال اهو لسة عايش برضه وباكل وبشرب وبتنفس 
اتصدق ياض ياهيثم لا انت مش عايش انت بتتكلم من العالم الاخر اصلا !!!!


صحيح هو ايه مفهوم ان الواحد عايش وخلاص ؟ يعني دي نظرية يعني 
غالبا اه في البلد دي تحمد ربنا انك عايش اصلا حتي لو بتوهم نفسك انك عايش 




طيب بلاش غم بقي وقول انت استفدت ايه من السنة اللي عدت دي :
1/ ان كل شىء زايل ومايبقي الا وجه الله 
2/ كمان مرة في الحالة الشخصية كل شىء زايل ومايبقي الا وجه الله 
3/ خرجت بنفس محطمة والحمد لله (نفسيتي في الحضيض )
4/ كل ما يجيلي امل في اي حاجة وياللعجب يروح بعد ايام قلائل 
5/ معشتش في 2011 غير ايام فعلا والباقي حاسس اني ميت 
6/ ابتعدت عن الكتابة اغلب الوقت عشان نفسيتي وبسبب اني حاسس اني مفلس التفكير ومتلخبط 
7/ بقيت اكره كل التيارات السياسية بلا استثناء وغالبا خدت قرار اني منتميش لاي حاجة وهطلع عين ابوهم كلهم واحد واحد بس افوق 
8/ بطىء بطىء السلحفاة في الماجستير بس ابتديت من شهر اشتغل فيه بسرعة شوية عاوز اخلص 
9/ فعلا كل ما اخد خطوة مليون حاجة ترجعني وارجع تاني من الاول (حصلت خمس مرات السنة دي )
10 عرفت انسان عمرى ما هنساه وغالبا مش هنساه :(
11/ مدونتي حاسس انها زعلانة مني وبتلعني عشان سبتها 
12/ مبقتش اقرأ زى الاول غالبا مقرتش خمس ست كتب علي بعض في السنة دي ودة معدل زيرو بالنسبة للي فات 
13/ سنة 2012 سنة الله اعلم هتبقي عاملة ازاى عليا بالنفسية دي 
14 / كفاية كدة 






بس خلاص 
غالبا هكتب الايام الجاية خواطر وحاجات شخصية ومش تاريخ لغاية ماربنا يعدلها ومزاجي يتعدل :(


سلام 



هناك 9 تعليقات:

لورنس العرب يقول...

الهم أصلح احوالنا جميعا

فاتيما يقول...

ينفع اقولك معلش يا هيثم ؟!!!

كنت قولتها لنفسى ..

بس 2011 كما وصفها ببلاغة على توتير
حد مش فاكراه دلوقتى
انها سنة إثارة عوضتنا عن 30 سنة ملل


معلش

فيما يختص بالجانب الشخصى
مقدرش أقول حاجة
بس فيما يختص بالشأن العام
اللى يخلينا نستحمل كل هذا القرف
ان الحكاية لسه مخلصتش
وكلمة النهاية مظهرتش ع الشاشة
احنا لسه فيها
ف قلبها
وبما اننا لاعبين فيها
كل حسب قدراته وجهده ...
يبقى لازم منبقاش حاسين براحة
لأن الماتش لسه مخلصش
لما يصفر الحكم ساعتها نقدر نوقف ونلقط نفسنا ونحمد ربنا و نلوح للجماهير ونروح مبسوطين بالنصر ...


ولحد دا ما يحصل
... معلش



كل سنة وانتا طيب يا هيثم
يا غـــالى
والسنة الجاية ان شاء الله
ربنا يكتبلك فيها كل الخير
لأن لو انتا مشوفتوش
اومال مين المفروض يشوفه يا بنى ..؟!!


كل الود ليك
والدعاء من القلب
بإن ربنا يحلى كل ايامك يا هيثم
وكل المحبة كمان
.. من اختك فاتيما

مصطفى سيف الدين يقول...

كلنا ذلك الرجل يا عزيزي
فعلا كان عاما من الاحباط المركز رغم اننا ظننا اننا بدأنا نسير في الطريق الصحيح الا اننا لم نستمر عليه وبدأت تتخبط بنا السبل
هذا بالنسبة للشأن العام
اما الخاص فانا مثلك هذا العام كان محبطا جدا في كل شيء
حقا كل شيء زائل ولا يبقى الا وجهه سبحانه
تحياتي وتمنياتي ان يكون العام القادم افضل

Tarkieb يقول...

كل سنة وانت طيب يا باشا ..ليه بقى ده حصل فيها حاجات حلوة في تونس وان شاء الله تحصل لينا السنة الجاية....كل شئ بالراحة هي دي مصر ياهيثم

Tears يقول...

حلو اوى البوست ده و سهل و مباشر وتحس فيه انك بتكلمنا عادى واحنا مجمعين مش فى التلفزيون :))

الثورة مستمرة و ح تنتصر لان كفاية تفتكر ان ربنا قال العدل أساس الملك و لما غاب العدل سقط مبارك زى ما ح يسقط نظامه بس على قد الحلم لازم نتعب

اغلبنا بيمر بحالة نفسية سيئة و بعدنا عن المدونات و الاصدقاء بس اكيد خبراتنا و وعينا زاد و عرفنا حقيقة ناس كتير احداث الثورة غربلتهم

أم هريرة.. lolocat يقول...

بطىء بطىء السلحفاة في الماجستير بس ابتديت من شهر اشتغل فيه بسرعة شوية عاوز اخلص

اهم شىء ياهيثم الماجستير
سيبك من كل اللى انت قلته
انا شايفة ان اهم حاجة تعملها تخلص من الماجستير
بلاش كسل ياهيثم وبلاش تشاؤم
الحمد لله خلصنا من مبارك واهله واللى جابوه وكل اللى بيحصل الان بمصر هيعدى اكيد ويمر بسلام

ومافيش حد مابيحصلش معاه حاجات مش حلوة لكن اكيد بردو بيحصل حاجات جميلة ربنا بيجعل فى كل محنة منحة

انت اهم شىء بالنسبة لك الماجستييييييييييير
والناس الجميلة والانسان اللى مش هننساه اكيد لو لنا نصيب نلقاه تانى اكيد هنلقاه والا ان شاء الله ربنا هيعوضنا عنه باللى نستحقه واكتر


قوم ذااااااااكر ياهيثم وبلاش كسل وسيبك من بلوجر والفيسبوك
المهم مستقبلك :)

كل سنة وانت طيب
تحياتى وتقديرى لك

هبة فاروق يقول...

واحنا كمان زهقنا منها سنه ملهاش ملامح
عجبتنى اوى نقاط الاستفاده من هذه السنه
هههههههههه اكثر من رائعه سخريه واضحه عما يدور حولنا من اشياء مستفزة
عجبنى البوست اوى
تحياتى

ستيتة يقول...

تخيل لما تكون سنة ثورة وكلنا قرفانين
سنة حلم وكلنا بنقول لها غوري
سنة تغيير وكلنا قافلين شرعات قلوبنا ومش طايقين
الغلط مش في الزمن
الغلط في اهل الزمن
ودول لامفر منهم
على رأي عبد المنعم ابراهيم
لا محيص لا محيص لا محيص

كل عام وانت افضل والسنة الجاية تحمل لك كل الفرحة والنجاح
أما مصر فهي تحتفظ بلقب صابرة حتى إشعار آخر

تحياتي

ماجد القاضي يقول...

السلام عليكم

أدعو الله أن تخرج مما أنت فيه يا هيثم، وأن يفرج كربهك وهمك عاجلا غير آجل..

سبحان الله.. في الوقت اللي انت بتكتب فيه الكلام ده.. كنت أنا باكتب فيه العكس تماااااااااما..!!!!

تحياتي ومنتظر أن أراك إن شاءالله بنفسية أفضل.. ومتنساش.... أنت ما تفكر فيه.