الأربعاء، 20 أكتوبر 2010

نظامك ايه ؟؟ (1)


بوجه الذى يبرز العظام منه والغطاء المعدني الذى يقيه من صدمات الموتسيكل القاتلة يهل علينا علي الشاشة ويطل علي ابطالنا الثلاثة المساكين المتلهفين الي من ينقذهم من هذه الورطة التي وقعوا فيها ..يريدون من اول الفيلم حل مشكلتهم العويصة ولكن لا جدوى من ذلك حتي يكلمون ذلك الشاب لينجدهم مما هم فيه ولكن هل ياترى سيحل المشكلة فعلا ام سيخيب امالهم ؟؟!!

كنت قد تكلمت في التدوينتين السابقتين عن السلاجقة ودولتهم التي لعبت دورا في حياة التاريخ الاسلامي ولكن هل هذا الدور انتهي الي ذلك ؟..لم اذكر كل السلاجقة العظام الذين تولوا عرش هذه الدولة وانما ذكرت سلجوق اصل هذه الدولة وطغرل بك باني الدولة والب ارسلان السلطان الشجاع والذى كان من الاهمية بمكان ان يكون في عداد هؤلاء العظماء ولكن عظمة الب ارسلان مرتبطة بعدة اشياء اولها سأذكرها في هذه التدوينة وهو وزيره الهمام نظام الملك ..

اذا قلنا ان سلجوق الاصل والباني للدولة السلجوقية هو طغرل بك فان نظام الملك هو مهندس الدولة ومخططها الاداري الذى لايكل ولا يتعب ..نظام الملك او ابو علي الحسن بن علي بن اسحاق الطوسي الذى يقول عنه المؤرخون من الفضائل ماتغني اي فرد ليعلو بين الخلق اجمعين واظن ان المؤرخين لم يكيلوه بالمديح الا انه يستحق ذلك ..نظام الملك ليس مجرد فرد او وزير في دولة ولكنه باني ومصلح حقيقي لفكر ومنهج استمر لعقود بعده بل انه كان النهضة الحقيقية في الفكر الاداري والسياسي والاقتصادى لعنصر الاتراك والدول التي بنوها في المشرق الاسلامي من الدولة السلجوقية التي كان وزيرها الي الدولة النورية التي قامت في حلب وهي التي يحكمها نور الدين استاذ صلاح الدين الايوبي لتنتقل الافكار الاصلاحية الي دولة اخرى كان لها اكبر الاثر في تاريخ مصر والشرق الاسلامي كله وهي الدولة الايوبية التي قامت علي اكتافها فكرة الجهاد وتطبيقه ضد الصليبيين الغزاه ...

لذلك كان نظام الملك وقوته وشدته في الحق والاصلاح تكفي وتغني الدولة السلجوقية لسنوات من التنظيم والهدوء لابد لي ان اسرد هذه الافكار الاصلاحية التي كانت لها من الاثر الكثير منها :

الف كتاب يدعي "سياست نامة " باللغة الفارسية واحتوى هذا الكتاب علي افكاره الادارية والاقتصادية التي نفذها فيما بعد واكثر ما اهتم به نظام الملك هو الامن الداخلي او المخابرات الداخلية وذلك عن طريق التجار والدراويش والمخبريين السريين الذين كانوا يبعثون اولا بأول المعلومات التي تهم السلطان والحكومة المركزية لمنع اي تمرد ضد الحكومة ولكن لابد لنا ان ننتبه الي ان اختيار المخبرين لم يكونوا هباءا بل انه اختيار دقيق واهم مايتميز به المخبر النزاهة والتقوى وكانوا يراقبون القضاه والولاه وكبار الموظفين اي مايشبه عندنا الجهاز المركزى للمحاسبات او الرقابة الادارية ..


الاصلاح الاقتصادى ..بالطبع الكلمة هذه سيئة السمعة في مصر حيث انك تسمعها منذ ثلاثون عاما متواصلة وهي الي جانب محدودى الدخل والبنية التحتية تدخل في قاموس الاستهبال المصري المعروف ..ولكن في قاموس نظام الملك تجد انها لها اساس وطعم ومذاق خاص به ..حيث اهتم بالزراعة وادخل نظام الاقطاع الزراعي علي جنوده وجعل لهم ان يدفع كل اقطاعي مبلغ الي خزينة الدولة في مقابل الانتفاع بأراضيه ويعمل فيها الفلاحون دون ان يكونوا تحت السيطرة الاقطاعية بل كانوا تحت رعاية الدولة التي كانت تشرط علي الملاك اعطاء البذور وادوات الزراعة والاجور للفلاحين ..وبذلك اقام نهضة زراعية واستقرار وفي نفس الوقت استقرت رواتب الجيش السلجوقي ...


اهتم نظام الملك بالعلم والعلماء والثقافة عموما ..وذلك لرغبته الداخلية في رفع شأن الدولة السجلوقية ..لابد انه فهم شىء مهم ان العلم لايبدو مظهريا بل جوهريا واساسيا في رفع الدولة الي مصاف الدول القوية ..العلم وحده هو من يرفع شأن الدول ..ولابد ايضا ان نذكر ان الكتب التي كانت تنسخ وتوضع في المكتبات التي انتشرت في ارجاء الدولة لم تكن
في غلافها الخلفي صورة حالمة لنظام الملك ومكتوب تحتها تحت رعاية السيد الفاضل نظام الملك ..او لم يكن نظام يجيش الاطفال في مهرجانات ليهتفوا بابا نظام راعي الثقافة والكتب ..

كان نظام الملك يجيش العلماء من اجل خدمة الدولة ..مجلسه ملىء بالعلماء في كافة المجالات ..بل انه اتخذ خطوة عظيمة للغاية اثرت في مسيرة العلم في الدول الاسلامية بعد ذلك وهي انشاء المدارس ..التي اسماها بالمدارس النظامية وانتشرت في كل ارجاء الدولة من بغداد الي اصفهان الي خراسان وغيرها من البلدان ..

كانت تعتبر مثل الجامعات الان حيث انفق علي بنائها مائتي الف دينار ..وارفق بها المكتبات واماكن النوم ورواق للصلاه واروقة اخري لاماكن طبخ الطعام للطلاب ..وكان التدريس فيها وفق المذهب الشافعي الي جانب العلوم الاخري
علي ايه حال لابد لنا من التحدث عن هذه المدارس مرة اخري ...

من الممكن ان ترى معي ان الكلام الذى سبق فيه شىء من الجفاف ..ما لنا وسيرة رجل انتهي وانتهت ايامه ..ولكن لابد ان نفهم ان نهضة نظام الملك هذه لم تكن الا بداية لنهضات اخري ..صلاح الدين كان اللبنة النهاية في هذا الصرح ..الدول التي بنيت في المشرق الاسلامي بعد نظام الملك كانت وريثة لهذه النهضة ..الدولة الايوبية كانت احدي تلك الدول بل ان صلاح الدين اتخذ بعض الخطوات المشابهة لنظام الملك خاصة في مسألة العلم حيث لجأ صلاح الدين الي بناء المدارس السنية لكي يزيل ما خلفه المذهب الشيعي من خرافات وتشويه للمصريين ليعيد مصر مرة اخري الي مصاف الدول التي تحترم نفسها ودورها وليقودها نحو القدس ..وقد اطلق الصليبيون علي القاهرة انها مفتاح القدس ..
الصليبيون فهموا اخيرا ..

بالطبع نظام الملك لم ينتهي بل له جزء ثاني لم اتحدث عنه وسأتركه في التدوينة القادمة ان شاء الله ..ولكن لابد لنا من انقاذ ابطالنا الثلاثة او بالاحري نرى انقاذهم علي الشاشة ..يدخل ذلك الشاب الذى يذكرك بعود القصب لشدة نحافته وينظر اليهم نظرة موحية غاضبة ثم يتفحص جهاز الفيدو ويحاول ان يجد حلا شافيا لهؤلاء لفتح الفيلم ومن ثم متعتهم به ..ثم ينظر اليهم ويقول :

- النظام مختلف ياكوريكات
-ياخبر اسود طيب وبعدين ؟؟
-يعني هناك تشوف صوت وصورة ..هنا متشوفش حاجة خالص
- طب والعمل ياريس ..
ينظر اليهم الريس "برايز" ويقول :

- هاعمل محاولة بس هتسمعوا صوت من غير صورة
يقولون : المهم الصورة سعادتك
يصيح فيهم برايز :
- كنتوا اسألوا روحكوا قبل ماتخدوا الفيلم دى منظومة مترتبة ودة اهم سؤال فيها :"النظام "
ثم يصيح فيهم اكثر واكثر :" النظام يابهايم "
- متزلناش بقي ياريس برايز ..!!
- العيب مش فيكم"العيب في النظام "

ثم يتركهم وينصرف ليتجرعوا الحسرة والندم في عدم تشغيل الفيديو ... (مشهد من فيلم "فيلم ثقافي ")


مصادر : كتاب تاريخ السلاجقة : علي الصلابي ...


الي لقاء ..مع نظام اخر

هناك 26 تعليقًا:

أنا - الريس يقول...

العدل
+
العلم
=
حضارة قوية
العدل
+
العلم
+
الدين
=
حضارة لن تزول إلا بفقد ضلع

لو قلت كلمة ياريت
لأتبعتها إنها لا تبني بيت

تحياتي لحصافة موضوعاتك

Unknown يقول...

لا تعليق.. حتى لا اضيع أثر التدوينة أو طعمها..

في انتظار الجزء الثاني.. 

--------------------
هدية صغيرة:
هذه نسخة عالية الجودة من كتاب: الاندلس - التاريخ المصور، للدكتور طارق سويدان.. ويعتبر من اهم الكتب التى تحدثت باسلوب سهل وشيق عن الاندلس الضائعه او الفردوس المفقود.. الكتاب مليء بالصور الرائعة وعدد صفحاته 520 صفحه.. الكتاب مرفوع على الميديافير وهذه روابط التحميل:


http://www.mediafire.com/?uuedyojmhzq

http://www.mediafire.com/?8k1nriyu56e

تحياتي

غير معرف يقول...

على الرغم غني كنت داخل النهاردة أتابع من بعيد بدوون تعليقات بس كالعادة شدني موضوعك الرائع

نظام الملك كنت قرأت عنه في كتاب الدولة العثمانية لعلي الصلابي ومكنتش متخيل ان فيه حد بالعظمة دي وميعرفوش الا القليل مننا

انتظر الاجزاء القادمة بشغف :)

richardCatheart يقول...

هههههههههههههههههههههههههه هايل هايل هايل


هايل نظام وهايل هيثم وربط نظام بالنظام
يارتنى كنت عشت الايام دى يا اخى الواحد زهق بجد

ايه الناس دى وصلت للقمه دى ازاى شخصيتها كان ايه فكرها كان ايه الواحد من كتر مابيشوف عطب مابقاش حاسس بشكل الحلو
انت اخدت حته من الفيلم بالفيلم كله

جميل كالعاده يا هيثم هاستنى اؤدام شويه تعملنا بقى سلسله متميزه عن ابو الصلح صلاح الدين
نتاج اللبنه النظاميه


نيجى بقى لردك هناك فى البوست اللى فات

انا مابكرهش ابراهيم عيسى انا بستمتع به اوى وهو بيتكلم فى برنامجه وبتعلم منه ومن ثقافته وخصوصا بأسلوبه الساخر المتتميز
بس انا ضدد تأليه البشر كله ليه ماليه وعليه ماعليه دى وجه نظرى ومافيش فرسان
ماقدرش انكر انه صوت عالى فى وش الفساد وكتير فش غلنا
فى مقالاته بس فى الاخر بردو ليه اللى ليه وعليه اللى عليه
دى وجه نظرى مابكرهوش ويمكن بحبه اكتر من ناس تانيه كتير ماقدرش اسمعها او اشوفها لو هاجمت الحكومه للسنه الجايه

وماتخافش مش هاجيب سيره لتيكو هو هايجى يقرا بنفسه

ههههههههههه ياعميل ههههههههههههههه فكرتنى بناديه الجندى فى مهمه فى تل ابيب يا راجل ههههههههههههههه

بس والله ماعرفش عنه حاجه هو لما بيغطس كده بيبقى عنده ضغط شغل ربنا يقويه ويعينه ويطمنا عليه
علشان يرجع يمسك فى خناقك ههههههههههههه


تسلم يا ابو الهيثم يا رائع يارب ديما ممتعنا باجمل كلام

كلمات من نور يقول...

ما شاء الله ......بوست يغنيني عن التعليق ...و علي الصلابي وتد من أوتاد التاريخ .جزاك الله خيرا يا هيثم

Tears يقول...

بتدينا معلومات قيمة كالعادة يا هيثم

عايزة اعلق على موضوع الاكتتاب لجريدة دستور جديدة

المشكلة مش فى الفلوس و لا المالك انما فى الحصول على ترخيص بالجريدة و النظام لا يريد ابراهيم عيسى

لو الجريدة صدرت بترخيص من قبرص ممكن تمنع من الدخول زى صحيفة القدس العربى

المشكلة فى النظام المبلطج المحتل

Unknown يقول...

هيثم
الله ينور عليك
وفي اشد الشوق لصلاح الدين

ولما نشوف هترطبة بأية ؟؟؟
أكيدمش هاتلقيلة نظام تشبهة بية
تحياتي لك

ليلى الصباحى.. lolocat يقول...

قاموس الاستهبال المصري المعروف

ليهتفوا بابا نظام راعي الثقافة والكتب ..

الصليبيون فهموا اخيرا ..

ليلى الصباحى.. lolocat يقول...

اليلام عليكم ورحمة الله
اعتقد ان فيه خطأ حصل فى تعليق سابق وهو ماكنش تعليق كان تجميع لكلمات اعجبتنى من كلامك بس (النت استهبل شوية )هههه
انت عارف انى مش بحب اعلق على مواضيعك بسرعة طبعا لانى احب ارجع لها مرة واتنين ويمكن تلاتة
ــــــــــــــــــــــــــــ
(قاموس الاستهبال المصري المعروف )
ده وليد الثقافة المستوردة والبعد عن الاصالة و تعاليمنا


(بابا نظام راعي الثقافة والكتب ..)
جميلة الكلمة دى اوى واضح تشير لايه هههه


(الصليبيون فهموا اخيرا ..)
والله ياهيثم الصليبيون فاهمين من الاول و لحد الان فاهمين عن اهل البلد واصحابها
علشان كده ماضيعهاش غير اهلها

عجبنى كلامك النهاردة اوى اوى ياهيثم كالعادة طبعا ههههه
فيه فى التاريخ العربى والاسلامى دول كتير اوى سقطت من ذاكرتنا ويمكن اساسا لم يتحدث عنها اى منهج دراسى
ياريت نتعرض للدول دى ببعض تفصيل اكتر فى تدوينات لك قادمة

ربطك لاحداث التاريخ ياهيثم رائع بتعرف تسبح فى صفحاته بطلاقة ماشاء الله عليك

فى انتظار باقى الانظمة
تحياتى لك

غير معرف يقول...

شكرا على البوست الجميل

mrmr يقول...

ديما معلوماتك قيمه يا هيثم
منتظره الجزء الثانى
اقعد بالعافيه

sal يقول...

صديقى

يبدو لى
انو مفيش فايدة لا فى الجهاز المركزى للحسابات
ولا فائدة من الرقابة الادارية ولا فائدة من الثقافة
ولا فائدة من العلم ولا انشاء المدارس

لان كل دا عمله نظام الملك
واحنا ماعندناش فى عصرنا زيه

احنا عندنا استبداد وفساد
حنقعد نحلم بنظام الملك والا بصلاح الدين ؟
مش حيجى صدقنى مش حيجى

حتقولى ايه العمل
حاقولك ان ما قلته عن الدولة الايوبية هو الحل

"" كل حسب استطاعته وقدرته ""

تحياتى وتقديرى

ماجد العياطي يقول...

من سماته الشخصيه ايضا انه كان قليل الكلام وكان يستمع كثيرا لمن

معه (نظام الملك طبعا وليس برايز )..

سبحان الله لم تظلم دوله في الاسلام مثل الدوله العثمانيه والاتراك بشكل عام

احسنت ياهيثم معلومات جميله

وربنا يستر على برايز

تحياتي

Haytham Alsayes يقول...

سيادة الرئيس

كلامك مظبوط جدا

تحياتي ياريس

Haytham Alsayes يقول...

ماجد القاضى

ربنا يكرمك الهدية جميلة جدا
اشكرك عليها جدا

تحياتي

Haytham Alsayes يقول...

سمو الامير

للاسف فعلا لانعرف عنه الا القليل

منورني دايما

Haytham Alsayes يقول...

ريتشاردى

ياريتش دى احلي حتة في الفيلم اساسا
مشهد معبر جدا زى الصورة المعبرة بتاعة الاهرام
هههههههههههه

وان شاء الله ممكن اعمل صلاح الدين بس في ناس بقي هتقولي
ييييييي ياعم صلاح الدين ايه
الناس يئست خلاص ياريتش الكلام مش بيحوق خلاص فينا
ربنا يستر


نيجي بقي لحبيب هارتي والملايين هيما
نفس اللي بتفكري في انا كدة
علي فكرة انا بزعل جدا لما يتكلم عن الصحابة او التاريخ هو الراجل مجتهد بس بيبوظ الدنيا باسلوبه في نظر البعض
بس مش يمنع انه محترم مهنيا وبيعرف من اين تؤكل الكتف
وطبعا انا بعتبرنفسي من تلاميذه اتعلمت اكتب منه واعرف سياسة منه برضه


وطبعا هو احسن مثلا من عبد الله كمال اللي هتقري له في البوست الجاى بلاوى

اما تيكو بقي دة مشكلة وهيتهمني كدة بالخيانة مش العمالة بس
ههههههههههههههههههه
وعلي فكرة انا مش بطيق الحاجة نادية الجندى دي بتستفزني علي الشاشة هههههههههههه

منورة دايما
سلميلي علي الحاج والاولاد

دمتم في حفظ الله

Haytham Alsayes يقول...

كلمات من نور

طبعا علي الصلابي من الكتاب المخضرمين والمحترمين
واسلوبه سهل ومليان رموز وعبر

تحية لكي

Haytham Alsayes يقول...

تتيرز

ربنا يكرمك

والله اديها محاولة انا عارف ان كلامك صح اصل دة نظام قذر ممكن يعمل كل حاجة تتصويرها بس الكرة في ملعب ابراهيم دلوقتي واظن انه لمح في حديثه الاخير انو عاوز يفتح صحيفة تانية مش عارف ايه بقي اللي يحصل

تحياتي

Haytham Alsayes يقول...

علي يونس

لا فيه بس صلاح الدين دة حكاية لوحده ان شاء الله هاسردها وقت تاني

تحياتي لمرورك

Haytham Alsayes يقول...

لولو كات

ههههههه
برضه النت بيستهبل زى واضع القاموس
هههههههههههههه

بتسعديني دايما بتعليقاتك الجميلة
وانا متفق معاكي جدا علي فكرة

وربنا يكرمك علي الاطراء الدائم دة

اللي اكيد اقل منه

تحياتي

Haytham Alsayes يقول...

شحات

شكرا علي مرورك

Haytham Alsayes يقول...

مرمر

شكرا علي مرورك

الله يعافيكي

تحياتي

Haytham Alsayes يقول...

سال

ليه مش هيجي
سيبني عندى امل الله يكرمك
يمكن لعل وعسي
مش يمكن انا ومش واخد بالي
هههههههه

تحياتي ياصديقي

Haytham Alsayes يقول...

ماجد العياطي

الله يرحم نظام الملك
فعلا في شخصيات اتهضم حقها في الدراسة

تحياتي لك

ستيتة يقول...

طيب اقول شكرا على البوست الرائع عن رجل لا ندرس سيرته مخافة الفتنة وهو نظام الملك
ولا على الربط المضحك جدا بين نظامه ونظام برايز؟
ههههههههههههههههههههههههه